Երկաթով սննդային հավելումները վնասում են ԴՆԹ-ն. news.am

Երկաթով սննդային հավելումները կարող են ընդամենը 10 րոպեում վնաս  հասցնել  օրգանիզմին, զգուշացնում են Լոնդոնի կայսերական քոլեջի գիտնականները: Նրանց հետազոտությունը ցույց է տվել, որ այդ հանքանյութն արյունատար անոթներում վնասում է ԴՆԹ-ն:

Չնայած հետազոտությունները կատարվել են լաբորատոր պայմաններում, այլ ոչ մարդկանց վրա, մասնագետները պարզել են, որ հավելումներում պարունակվող երկաթի մակարդակը կարող է 10 անգամ գերազանցել մարդու առողջությանն անհրաժեշտ նորման:

Երկաթն օրգանիզմի համար շատ կարեւոր հանքանյութ է, որը նաեւ ամենակարեւոր «շինարարական» նյութերից է համարվում, կարծում են գիտնականները: Սակայն մարդիկ երկաթի քիչ քանակի կարիք ունեն. տղամարդկանց օրական  մոտավորապես 8.7 մգ երկաթ է անհրաժեշտ, իսկ վերարտադրողական տարիքի կանանց` 14.8 մգ: 100 գրամ տավարի մսում մոտավորապես 3 մգ երկաթ կա, իսկ 100 գ սպանախում` 2.7 մգ: Բրիտանացի բժիշկների խոսքով, մարդն օրվա ընթացքում չի կարող սննդամթերքից 20 մգ-ից ավելի երկաթ ստանալ:

Երկաթով սննդային հավելումներում մոտ 14-65 մգ երկաթ է պարունակվում, ինչը, գիտնականների կարծիքով, չափազանց շատ է, հատկապես եթե հաշվի առնենք, որ մարդը երկաթ կստանա նաեւ մթերքներից: Երկաթի ավելցուկը, ինչպես նշում են գիտնականները, կարող է վտանգավոր լինել առողջության համար եւ երակներին ու զարկերակներին լուրջ վնասներ հասցնել:

Հարցեր, պատասխաններ, մեկնաբանություններ